ਤਾਜਾ ਖਬਰਾਂ
ਭਾਰਤੀ ਟੀਮ ਦੇ ਸਟਾਰ ਖਿਡਾਰੀ ਸ਼੍ਰੇਅਸ ਅਈਅਰ ਆਸਟ੍ਰੇਲੀਆ ਦੇ ਖਿਲਾਫ ਤੀਜੇ ਵਨਡੇ ਮੈਚ ਦੌਰਾਨ ਗੰਭੀਰ ਰੂਪ ਨਾਲ ਜ਼ਖ਼ਮੀ ਹੋ ਗਏ ਸਨ ਅਤੇ ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਮੈਦਾਨ ਤੋਂ ਬਾਹਰ ਜਾਣਾ ਪਿਆ ਸੀ। ਬਾਅਦ ਵਿੱਚ ਅੰਦਰੂਨੀ ਖੂਨ ਵਗਣ (internal bleeding) ਦਾ ਵੀ ਪਤਾ ਲੱਗਿਆ। ਇਸ ਤੋਂ ਬਾਅਦ ਤੁਰੰਤ ਉਨ੍ਹਾਂ ਨੂੰ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ।
ਹੁਣ ਕ੍ਰਿਕਟ ਪ੍ਰਸ਼ੰਸਕਾਂ ਲਈ ਇੱਕ ਵੱਡੀ ਖੁਸ਼ਖਬਰੀ ਸਾਹਮਣੇ ਆਈ ਹੈ। ਅਈਅਰ ਨੂੰ ਹੁਣ ਹਸਪਤਾਲੋਂ ਛੁੱਟੀ ਮਿਲ ਗਈ ਹੈ।
BCCI ਨੇ ਦਿੱਤਾ ਵੱਡਾ ਅਪਡੇਟ
ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਦੀ ਪ੍ਰੈੱਸ ਰਿਲੀਜ਼ ਵਿੱਚ ਦੱਸਿਆ ਗਿਆ ਹੈ ਕਿ ਸ਼੍ਰੇਅਸ ਅਈਅਰ ਦੀ ਸੱਟ ਦੀ ਪਛਾਣ ਕਰਕੇ ਉਨ੍ਹਾਂ ਦਾ ਇੱਕ ਛੋਟਾ ਜਿਹਾ ਆਪ੍ਰੇਸ਼ਨ ਹੋਇਆ, ਜਿਸ ਤੋਂ ਬਾਅਦ ਖੂਨ ਵਗਣਾ ਬੰਦ ਹੋ ਗਿਆ ਅਤੇ ਉਨ੍ਹਾਂ ਦਾ ਸਹੀ ਇਲਾਜ ਕੀਤਾ ਗਿਆ ਹੈ। ਹੁਣ ਉਨ੍ਹਾਂ ਦੀ ਹਾਲਤ ਸਥਿਰ ਹੈ ਅਤੇ ਉਹ ਚੰਗੀ ਤਰ੍ਹਾਂ ਠੀਕ ਹੋ ਰਹੇ ਹਨ। ਬੀ.ਸੀ.ਸੀ.ਆਈ. ਵੱਲੋਂ ਦੱਸਿਆ ਗਿਆ ਹੈ ਕਿ ਉਨ੍ਹਾਂ ਨੂੰ ਹਸਪਤਾਲ ਤੋਂ ਛੁੱਟੀ ਦੇ ਦਿੱਤੀ ਗਈ ਹੈ।
ਅੱਗੇ ਦੀ ਜਾਂਚ ਲਈ ਸਿਡਨੀ ਵਿੱਚ ਹੀ ਰਹਿਣਗੇ ਅਈਅਰ
ਬੀ.ਸੀ.ਸੀ.ਆਈ. ਨੇ ਸਿਡਨੀ ਵਿੱਚ ਡਾਕਟਰ ਕੌਰੌਸ਼ ਹਾਘੀਗੀ ਅਤੇ ਉਨ੍ਹਾਂ ਦੀ ਟੀਮ ਦੇ ਨਾਲ-ਨਾਲ ਭਾਰਤ ਵਿੱਚ ਡਾਕਟਰ ਦਿਨਸ਼ੌ ਪਾਰਦੀਵਾਲਾ ਦਾ ਦਿਲੋਂ ਧੰਨਵਾਦ ਕੀਤਾ ਹੈ, ਜਿਨ੍ਹਾਂ ਨੇ ਸ਼੍ਰੇਅਸ ਅਈਅਰ ਦਾ ਸਭ ਤੋਂ ਵਧੀਆ ਇਲਾਜ ਯਕੀਨੀ ਬਣਾਇਆ। ਅਈਅਰ ਅਜੇ ਅੱਗੇ ਦੀ ਜਾਂਚ ਲਈ ਸਿਡਨੀ ਵਿੱਚ ਹੀ ਰਹਿਣਗੇ। ਸਫ਼ਰ ਕਰਨ ਲਈ ਫਿੱਟ ਹੋਣ 'ਤੇ ਉਹ ਭਾਰਤ ਪਰਤਣਗੇ।
ਮੈਦਾਨ 'ਤੇ ਕੀ ਹੋਇਆ ਸੀ?
ਆਸਟ੍ਰੇਲੀਆ ਦੇ ਖਿਲਾਫ ਤੀਜੇ ਵਨਡੇ ਮੈਚ ਵਿੱਚ ਹਰਸ਼ਿਤ ਰਾਣਾ ਦੀ ਗੇਂਦਬਾਜ਼ੀ 'ਤੇ ਆਸਟ੍ਰੇਲੀਆਈ ਬੱਲੇਬਾਜ਼ ਐਲੇਕਸ ਕੈਰੀ ਨੇ ਇੱਕ ਵੱਡਾ ਸ਼ਾਟ ਮਾਰਿਆ। ਇਸ ਗੇਂਦ ਨੂੰ ਮੁਸਤੈਦੀ ਨਾਲ ਫੀਲਡਿੰਗ ਕਰ ਰਹੇ ਸ਼੍ਰੇਅਸ ਅਈਅਰ ਨੇ ਦੌੜ ਕੇ ਫੜ ਲਿਆ, ਪਰ ਇਸ ਦੌਰਾਨ ਉਹ ਡਿੱਗ ਪਏ। ਫਿਰ ਵੀ ਉਨ੍ਹਾਂ ਨੇ ਕੈਚ ਨਹੀਂ ਛੱਡਿਆ। ਬਾਅਦ ਵਿੱਚ ਉਹ ਦਰਦ ਨਾਲ ਕਰਾਹੁੰਦੇ ਹੋਏ ਦਿਖਾਈ ਦਿੱਤੇ। ਤਦ ਉਹ ਕੁੱਲ੍ਹੇ ਨੂੰ ਫੜੀ ਹੋਏ ਨਜ਼ਰ ਆਏ ਸਨ। ਫਿਰ ਉਹ ਮੈਦਾਨ ਤੋਂ ਬਾਹਰ ਚਲੇ ਗਏ ਅਤੇ ਉਨ੍ਹਾਂ ਦੀ ਜਗ੍ਹਾ ਫੀਲਡਿੰਗ ਕਰਨ ਯਸ਼ਸਵੀ ਜੈਸਵਾਲ ਮੈਦਾਨ ਵਿੱਚ ਉਤਰੇ ਸਨ। ਬਾਅਦ ਵਿੱਚ ਅਈਅਰ ਦੀ ਸੱਟ ਵਿੱਚ ਅੰਦਰੂਨੀ ਖੂਨ ਵਗਣ ਦਾ ਪਤਾ ਲੱਗਿਆ ਅਤੇ ਉਨ੍ਹਾਂ ਨੂੰ ਤੁਰੰਤ ਹਸਪਤਾਲ ਪਹੁੰਚਾਇਆ ਗਿਆ।
ਸ਼੍ਰੇਅਸ ਅਈਅਰ ਦਾ ਕਰੀਅਰ ਰਿਕਾਰਡ
ਸ਼੍ਰੇਅਸ ਅਈਅਰ ਨੇ ਭਾਰਤੀ ਟੀਮ ਲਈ ਵਨਡੇ ਕ੍ਰਿਕਟ ਵਿੱਚ ਸਾਲ 2017 ਵਿੱਚ ਸ਼ੁਰੂਆਤ ਕੀਤੀ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ 73 ਵਨਡੇ ਮੈਚਾਂ ਵਿੱਚ ਕੁੱਲ 2917 ਦੌੜਾਂ ਬਣਾਈਆਂ ਹਨ, ਜਿਸ ਵਿੱਚ ਪੰਜ ਸੈਂਕੜੇ ਅਤੇ 23 ਅਰਧ ਸੈਂਕੜੇ ਸ਼ਾਮਲ ਹਨ। ਆਸਟ੍ਰੇਲੀਆ ਦੌਰੇ 'ਤੇ ਦੂਜੇ ਵਨਡੇ ਮੈਚ ਵਿੱਚ ਉਨ੍ਹਾਂ ਨੇ ਅਰਧ ਸੈਂਕੜਾ ਲਗਾਇਆ ਸੀ ਅਤੇ 61 ਦੌੜਾਂ ਦੀ ਪਾਰੀ ਖੇਡੀ ਸੀ।
Get all latest content delivered to your email a few times a month.
